خفة دم الشعب المصرى ---- طراااائف المظاهرات

يتميز الشعب المصرى بخفة الدم وبروح الفكاهة حتى فى أوقات الأزمات والمحن وظهر ذلك جليا فى مظاهرات الغضب من خلال الشعارات واليافطات التى خرج بها المصريون الى الشارع وأيضا من خلال النكات والطرائف التى أطلقها الشعب المصرى على النظام وقد جمعت لكم هنا بعضا من هذه الطرائف أتمنى ان تحوز إعجابكم

بعض شعارات المظاهرات:
هما بياكلوا حمام وبط ... وكل الشعب جاء له الضغط

ياسوزان قولي للبيه ... ربع قرن كفايه عليه

شيلوا مبارك وحطوا خروف ... يمكن يحكم بالمعروف
*** *

والأن إلى بعض النكات والطرائف:

قالوا لاحمد عز من اين لك هذا ؟
قال هذا من فضل ربي
رد الشيطان عليه و قال اه يا واطي يا ناكر الجميل
*****

برادعي و واحد من الاخوان و احمد عز راكبين عربية بسواق
قام البرادعي قايل.... انا لما بخطب فى الناس بيسقفلي مليون واحد
راح بتاع الاخوان قايل...انا لما بروح مسجد بيسقفولي نص مليون
قال احمد عز ...انا لما بدخل الحزب بيسقفلي ربع مليون
قام السواق قايلهم...انا لو دخلت بيكم فى حيطة دلوقتى هيسقفلي 80 مليون
*****

_أمنية واحد مصري : يا ريت مبارك كان ضربنا إحنا الضربة الجوية ، وراح حكم إسرائيل 30 سنة ، كان زمانهم بيشحتوا دلوقتي
******

عاجــل: بعد استقالة جمال مبارك و الشريف و شهاب من الحزب الوطني
الشعب يطالب الرئيس بتطليق سوزان
*******

مبارك بعد ما مات قابل السادات و عبد الناصر ، سألوه : هاه ؟ سم ولا منصة ؟ رد عليهم بحرقة وقال : فيس بوك
******

ما الفرق بين التليفزيون المصري وسبيس تون ؟
سبيس تون بتفرجنا علي الدنيا التلفزيون المصري بيفرج الدنيا علينا
*******

يديعـــوت أحرنـــوت | مبــارك هو الرجل الوحيد في العالم الذي مازال يسأل عن أحوال شارون منذ أن دخل في غيبوبة
****

السجينات فى سجن النسا اعترضو قالو اشمعنى يهربو الرجاله و يسيبو الستات
******

عاجل جدا :الجراح العالمى مجدى يعقوب يصل الى مصر لعمل جراحة فصل التوأمين مبارك والكرسى
*****

مؤكد : تم تغيير اسم سلسله مطاعم كشرى التحرير الى كشرى المندسين
****

اوباما بيقول لمبارك اكتب رسالة وداع للشعب
مبارك رد :ليه هو الشعب رايح فين؟؟؟؟؟؟
******

مكاسب الثورة المصرية: ١. اقالة الحكومة الأردنية ٢. رفع قانون الطوارئ في الجزائر ٣. اعلان الرئيس اليمني عدم ترشيح نفسه للرئاسة ٤. تعديل الدستور الصيني ٥. قمع الشعب السوري قبل ما يفكر يثور ٦.تعهد الرئيس العراقى انه لن يترشح لفترة رئاسة قادمة
اي خدمه يا عرب
********

الشخص الوحيد الذي التزم بقرار منع التجول هو الرئيس حسني مبارك
******

واحد مخنوق من المظاهرات بيقول : يعملوا بقى "سبت الخلاص" و "أحد الصمود" و "إثنين الإطاحة" و "ثلاثاء الإرادة" و "أربعاء التصميم" و "خميس الإعتصام" و "جمعة الوداع" ، و نضرب لنا أسبوع كمان يعملوا فيه "سبت الضياع" و "أحد الزهق" و "إثنين الفضا" و "ثلاثاء الخفة " و "أربعاء اللذاذة" و "خميس اللطافة" أصل احنا فاضيين
****

زهقان بيقول : يا جدعان بقى ، اللب اللي في البلد قرب يخلص ، عاوزين نفض المظاهرات دي
********

تلميذ كتب على الفيس بوك يقول ياجماعه انتو دلوقتى بتكتبو التاريخ وانا طالب وبذاكر التاريخ فاختصرو بقى عشان مذاكرش كتيير
*****

كيف تتناول وسائل الإعلام خبر سقوط المطر على المتظاهرين:

جماعة الاخوان المسلمين : لا حوار مع نظام مبارك حتى تتوقف الامطار
شباب سته ابريل: لقد وعدنا الرئيس مبارك بالحماية والأمان وهاهى الأمطار تسقط فوق رؤسنا
قناة الجزيره : وصلنا من موفدنا فى القاهره أنباء عن سقوط أمطار غزيره على المتظاهرين دبرها لهم بلطجية الرئيس مبارك
قناة النيل للأخبار : لا صحة على الإطلاق لما تردده وسائل الإعلام العميله عن سقوط أمطار على المتظاهرين
*****

عاجل: تم الكشف عن ان سمكة القرش التى روعت سياح شرم الشيخ الشهر الماضى هى اساسا" اخوان مسلمين,, و تلقت تدريبا" فى ايران و الموساد (مع بعض!!),, و بالتشريح وجد بداخلها اجندات اجنبيه و اصابع خارجيه,, اضافه الى سمكة بلطى تابعه لقناة الجزيره
**************

من اليافطات المضحكه التى يحملها المتظاهرون:

رابطة نجارى مصر بيسألو الأسطى مبارك ما نوع الغراء الذى تستخدمه؟

امشى بقى إيدى وجعتنى

هتمشى .. هتمشى .. انجز بقى عاوز اروح أحلق

امشى بقى مراتى وحشتنى

لو مااستحميتش النهارده فى بيتنا .. هستحمى يوم الجمعه فى قصر الرئاسه

باى مبارك .. موبايلات بقى

مبارك يتحدى الملل

ارحل الوليه عاوزه تولد والواد مش عاوز يشوفك
**************

شكرا ايتها الشقيه الجميله ههههههههه اللهم اسعدها وفرحها
ويكون عقد قرانك فى ميدان التحرير والكوشه امام منصه الثوره[b]

هههههههههه

أعزكم الله يارب

ياريت والله ياريت

ههههههههه

ربنا يسعد قلب حضرتك يارب

الحمد لله انا فرحت بالثورة وضحكت كمان
ربنا يخليكى

ربنا يكرم حضرتك
مليون مبروك

تشرفت بمرور حضرتك الكريم

» (((( السابع عشر ))) هل ياترى سينجح الشعب المصرى فى سنه اولى ديمقراطيه او لاقدر الله 00000000
» -*/ التجربه الالمانيه -*/ عندما دمرت المانيا الشعب رضى بالحد الادنى من الاجور بل عمل الشعب ساعات زياده وبدون اجر
» السؤال المحورى هل مصر المحروسه مازالت بخير وكيف ترى الحراك فى الشارع المصرى الموقف ضبابى وزئبقى ندعوا الله سبحانه وتعالى ان يتعافى الشارع المصرى وتتضح الرؤيه
» HHH كان شعار الثوره hhh الشعب يريد اسقاط النظام اليوم الشعب يريد اصلاح النظام تتفق ام تختلف ولماذا
» لا لإهانة الجيش المصرى