عابدين( منقول)

دى حكاية فى التاريخ , محفوظة فى قلوبنا

محفورة فى الوجدان , منقوشة على توبنا

عبرة تقول للناس , لا نسينا ولا توبنا

يمكن خُطا الأجداد , تكشف لنا عيوبنا

****

شق الطريق للميدان "عرابى" وجنوده

بالروح و عِز الوِلد يفدوا الأرض ويجودوا

وقف الخديوى إتشال وإتحط وإتعنتظ

وهُمَه نبض الوطن ع العهد ما يحيدوا

****
والفارس المقدام , قلبه يضخ لهيب

وبسيفه فوق الفَرس , مشهد بطولى مهيب

ولا خاف سلاح ولا حرس , ولا صولجان ترهيب

ده الحشد فى الميدان , خلىَ الصبايا تشيب

****
عرابى بدأ الكلام , زلزل ضلوع المكان

الغاصب المحتل , ما لهوش فى مصر أمان

لابد ينهض جيش , يحمى الوطن والعِرض

أرواحنا فوق الكفوف , مهما يضن الزمان

****
صرخ الخديوى وقال : ما أنتم إلا عبيد

عايشين على الإحسان , واللى تجود به الإيد

بقى فلاحين أوباش , تجرؤ وتتكلم ؟

فى حضور ولى النعم تطلب أمور وتزيد

****
كلمة "عرابى" سيف , وامض كأنه نهار

أحــــرار بطلق الولادة , من أمهات أحــرار

الشعب فوق العروش , والمُلك والتوريث

وأمانة بعد اليوم , نِحيا ونِموت أحـــرار

****
اليوم ده ما أشبهه , بإمبارح اللى فات

حطيت سوا الصورتين , أبحث عن الفروقات

عرش وبطانة وقصر .. نفس الميدان عابدين

ولمحت نفس الحشود , وِاسع المدى جايين

لسّه فى شرع الملوك , شعبك يا مصر عبيد

مُرغم بلوى الإيد , ع الورث و التمديد

والجمهورية يادوب : خِتم و علم و نشيد

****
لكن برغم الزيف , والسيف على رقابى

صوت النفير بيصول , وينادى يا عرابى

أحفادك الأحـــرار , لا نلين ولا نتاطى

والظُلم والتوريث , هنجيب عاليه واطى


طـاهر كمـال