هموم الكوكب المهزوم

هموم الكوكب المهزوم

أنا طالع لِحَدّ السوق فى إيدى (أديب)
أجيب وأجيب ومهما هجيب
لا فيه حاجة مكفيّه
وحتى ان جبت ملوخيه
تلاقيها جابت أرنب
وهوه يوسع الملعب
ولا نفرغ من الألاعيب
**
وبعد السوق تلاقى حقوق
لا تقدر تنسلخ منها
ولا ان سديتها يوم هتروق
شقوق عماله تتفتح
وتخلق من وراها شقوق
ولولا انك تكون بالله
ومن ايده تكون مرزوق
لا تقدر تكفى أكلة يوم
ولا تِجْهَزْ لواد حندوق
يدق الباب يقول طالب
يا باشا القرب م البرقوق
ولا تقدر تكون جاهز
لأزمة صحه أو يوم سوء
أقول لك أيه آهى ماشيه
بتدبير الكريم من فوق
**
ولا تحزن
ولا تشيل يا حبيبى الهم
لو بصينا حوالينا
وشوفنا النار وبحر الدم
ولو بصينا حوالينا
وشوفنا الهم ما يترم
مجاعه هناك وحرب بتطحن المساكين
وناس نايمه على كرتونه فى الشارع
لا هم نايمين ولا صاحيين
ونار والعه ما هم عارفين وراها مين
وهباشين فى كل زقاق بسنجتهم
وعاملين للغلابه كمين
ولو شوفنا اللى ماشى مودع الصحه
نقول راضيين
نبات شاكرين
ونحمد ربنا ان احنا
فى نعمه بس موش داريين
**
صباحك فل يا صاحبى
وراعى اولادى من بعدى
وساتر بيتى فى بُْعْدى
وكل ما ليله بتعدى
بحس اكتر
وبتفكر
وبتدبر
فى حكمة ربنا إنى
لقيتك يوم هنا جنبى
ويمكن ده اللى ريحنى
وشال الوهم من قلبى
**
صباحك فل يا شمعه
من الزمن الجميل باقيه
شافت بعنيها رقص الطير
هناك ع التوته والساقيه
وعاشت فى زمان راقى
وخير باقى وناس راقيه
وداقت متعة اللمه
فى لحظة مدفع الإفطار
وداقت حب مالى الدار
وداقت رحمه شايلنها
صغار وكبار
وناس تجرى للهفة جار
وكنا قليلين جدا
ومن عزوتنا كنا كتار
وكنا كبار
وكانت كل حاجه بدقه وبمقدار
ورغم الفقر كنا ف خير
وكان الحب بالقنطار
وفوتنا التوته والساقيه وفوتنا الدار
وفوتنا الرحمه والطيبه
وبقينا ف نار
وفوتنا لمه الإفطار
وأصبح كل فرد ف دار
وقطَّعنا حبال القربى بإدينا
وأصبح بينا أعلى جدار
مهيش أقدار
ولا دى حكمة القهار
ولا قدرى ولا قدرك
ووجهة نظرى أو نظرك
دى خيبة عقل واستهتار
وبكره ندوق نتيجتها دمار فى دمار
**
صباحك فل
انا بصحى فى قلبى هم
وفى عروقى بيغلى الدم
ولا عارف أصلَّح أيه واللا أيه
ولا عارف عليه أيه وليَّا أيه
يا نور عينى بقينا فى زمان التيه
زمان لا بيرحم الضعفا
ولا عارف وجوده ليه
زمن توََهَان
زمن فَلَتان
زمن دوَرَان
فى آلة كوكبه فارغه
سايقها حيتان
وكله بفجَّر البركان
صباحك فل
احفظها ليوم يمكن تكون برهان
على حاضر ، على بكره ملوهش أمان
وخليها تقول بعدى كلام يمكن يلاقى ودان
وجايز بكره ييجى يوم
يكون فيه ناس حداها علوم
بدال ناس قاعده تقرا نجوم
نجوم كوره ونجوم سينما
نجوم مسرح نجوم سيجما
وطالعهم مالوهش نجوم
ساعتها يمكن العاقلين
يشوفو ويدرسوا حالنا
يحاولوا يعرفوا مالنا
وهموم الكوكب المأزوم
وانا قصدى أقول مهزوم
**
د. محمد عبد المطلب جاد
أستاذ سيكولوجيا الإبداع – جامعة طنطا
صباح الجمعة 15 / 8 / 2008

فى حوار مع صديقى الصيدلى الذى يطببنى وهو جار حبيب

أديب المشار إليه فى أول القصيدة ( أديب مترى ) صديق يرافقنى فى رحلة التسوق يحمل عنى ويساعدنى وله أفضال عده

معذرة إن كانت القصيدة مدرجة من قبل

شكرا جزيلا لمن يمتعنا دوما بأطروحاته الفنيه

والله ياسيدى لقد ارجعتنا لبيرم ورفاقه من الرواد

فى عالم السخريه رائع وجميل ياسيدى ذلك

المصرى الساكن جواك بخفه دمه ونقده اللازع

من حياته ومعيشته ومحياه لاحرمنا الله من ابداعاتك

وامتعاتك

أعزك الله أحى الحبيب

لا حرمنى الله قلبك الطيب

رااااائع يا دكتور وشكرا على التوضيح لان انا وقفت امام كلمة اديب اكثر من ربع ساعة والحمد لله
تقبل مرورى
بيقولوا الملوخية بالارانب جميلة

الله يسعد قلبك يا رفيق الروح

تسلم يا دكتور

أسعد الله مساءك

وحشتنا والله يا دكتور محمد

انا مصرى مهاجر من مصر منذ عشر سنوات
تعرفت على المنتدى من على احدى الصفحات على الفيس بك وكانت هذه القصديدة هى الدافع لعمل عضوية
انا معجب جدا بهذه القصيدة واتمنى ان اتعرف على الدكتور محمد

» هموم الكوكب المأزوم