admin
Admin
عدد المساهمات : 2245
نقاط : 4031
تاريخ التسجيل : 14/05/2009
الموقع : تنمية مهارات العمل الاعلامى
 |  موضوع: مديحة  الإثنين 12 أكتوبر 2009 - 9:36 | |
| " كان ياما كان فى سالف العصر والأوان وما يحلى الكلام إلاّ بذكر النبى عليه الصلاة والسلام , كان فيه بنت , والبنت دى جميلة الجميلات وإسمها مديحة , ومديحة دى كانت عايشه مع أمها وأبوها فى أمان , وكانت الأسرة دى سعيدة قوى ببنتهم , وفى يوم من الأيام عيت أمها وماتت بعد ما عانت من المرض لسنين كتيرة قوى ,وبعد ما أمها ماتت لافت عليها واحدة من الجيران وعملت روحها بتحبها قوى علشان تقدر تتجوز من أبوها اللى ما كانش عايز يتجوز واصل , وقعدت تقول للبت أنت لوبتى كت أعمل وأعمل وأعمل وكنت أحطك فى عينىّ لتنين , وفضلت تخش وتطلع عليهم لحد ما آن الآوان , والبت قالت لأبوها : فلانة دى مليَّة قوى ياأبوى , وبتعاملنى زى بتها , ومرَّت ليام والراجل اتجوز الست دى , وبعد ايام قليلة وبعد ما خلفت من الراجل بت إسمها زبربر وولد إسمه محمد بدت تتغير معاها , وتعاملها معاملة وحشة وتضربها قوى , وعشان ما مديحة دى كانت جميلة جل الله زين ما خلق , وعيالها هىَّ كانوا سود ووحشين , كانت حطاها فى دماغها ومسرحاها فى الغيط طول النهار , بعد ما طلعتها من المدرسة , ومديحة كان ليها بقرة فلتتها لها أمها قبل ما تموت وكانت بتقعد ترعاها طول النهار , وكانت مرت أبوها تبعت لها مع محمد وزبربر لقمة ناشفة , وحتة جبنه قديمة , وكانت مديحة تاخد اللقمة المصوفة وحتة الجبنه وتديها للبقرة , وتقول لها : حُطى لى يا بقرتى .. زى ما كانت بتحط لى أمى آكل فتروح البقرة حاطه قدامها من كل ما لذ وطاب : العيش واللحم والفواكه ... وبعد ما تخلِّص أكل , تقوم تقول لها , شيلى يا بقرتى زى ما كانت ع تشيل لى أمى زمان , وفى يوم من الأيام قعدت مرات أبوها تفكر , وتقول لنفسها : البت دى كل ما تروح تحلى وتتصبى , البت دى بتاكل إيه ؟ وبتاكل منين ؟ , دا كل اللى بابعتهولها لقمة عيش مصوفة وحتة جبنه قديمة , وأنا عيالى اللى بوكلهم البسكويت والبسبوسة كل ما يروحوا يوحشوا أكتر, قامت جابت عيالها محمد وزبربر وقالت لهم : خدوا لقمة العيش دى وحتة الجبنه القديمه , وعايزاكوا تعرفونى البت دى عايشة إزاى وبتاكل إيه بالظبط , قام راح محمد وزبربر وودوا لها الأكل , وبعد ما خدت الأكل منهم , سألوها : يا مديحة يا أختى , إحنا نفسنا نبقى حلوين زيِّك , والنبى قولى لنا بتاكلى إيه ؟ قالت لهم : طب أقول لكم بس ما تقولوش لمَرَت أبوى , قالوا طيب , راحت حطت اللقمة المصوفة وحتة الجبنة القديمة للبقرة وسقفت لها جات وقالت لها : حُطى لى يا بقرتى .. زى ما كانت أمى بتحط لى آكل , وقالت لهم اطلبوا الأكل اللى انتوا عايزينه وفعلا طلبوا الأكل وجه , وكلوا والواد كل ما ياكل خبور كان بيحط خبور فى عبه ياكل ويحط ياكل ويحط وبعد ما كلوا قالت مديحة للبقرة شيلى يا بقرتى .. زى ما كانت ع تشيل لى أمى زمان ولما روحوا سألت مرت أبوها العيال : عرفتوا يا عيال هىّ عايشة إزاى وبتاكل منين ؟ قالوا لها إيوه يامه .. البقرة بتاعتها هى اللى بتجيب لها كل اللى بتتطلبه , جابت لنا وكلنا لما شبعنا , قامت قالت لهم : يا عيالى لازم نعمل حيله نموِّت بيها البقرة دى, أنا حاعمل قوم قالت لهم يا عيالى لازم نعمل حيله نموت بيها البقرة دى, أنا حاعمل روحى عيانه قوى وانتوا تروحوا تيجيبوا لى الدكتور , وفعلاً راحوا وجابوا الدكتور , وفضلت ورا الدكتور لما خلته يقول لجوزها إنها عشان تطيب لازم تاكل قشة بقرة , وماكدبش الدكتور خبر وراح قال لهم : دى لازم تاكل قشة بقره عشان تروق , راحوا قالوا لمديحة لازم ندبح البقرة بتاعتك عشان مرت أبوكى تروق , فمديحة قعدت تصرخ وتقول : ما تدبحوش بقرتى , فراحوا خدوا البقرة غصب عنها , وجابوا الجزار عشان يدبحها , وقعد الجزار يدبح فيها إنه تدبح ماتدبحش والسكينه مش عارفه تخش فيها واصل , وهى تقول لها ماتدبحيش يا بقرتى أوى تدبحى يا بقرتى , وهى مش راضية تندبح , وهما يضربوا فيها ويقولوا لها : قولى : اتدبحى يا بقرتى , ولما تعبت من كتر الضرب قالت لها اتدبحى يا بقرتى , جات مدبوحه على طول , ييجوا يسلخوها تقول لها ما تتسلخيش , ما تتسلخش , يفضلوا يضربوا فيها لحد ما تقول لها اتسلخى يابقرتى , فتيجى مسلوخة , ييجوا يقطعوا لحمها , فتقول لها : ما تتقطعيش , فما تتقطعش , يقعدوا يضربوا فيها لحد ما تقول لها : اتقطعى فتتقطع , ولما ييجوا ياكلوها تقول لها : ما تتاكليش فماتتاكلش , يقعدوا يضربوا فيها لحد ما تقول لها اتاكلى فتتاكل , ييجوا يهضموها , تقولها : ما تتهضميش يا بقرتى , يفضلوا يضربوا فيها لحد ما تقول لها اتهضمى فتتهضم وبعد كده جات مرت أبوها عيت صح صح , فقالت لزبرر بتها : هاتى لى يا زبربر يا بتى شوية مية من البح , فراحت زبربر تجيب لها شوية مية , فكل زبربر ما تروح عند البحر البحر يبعد عنها , وكل ما تقرب القلة تانى وتالت وعاشر ييجى بعيد عنها , ولما غلبت وما لقيتش فايدة راحت شافت حمارة بتشخ فملت منها القلة , وهىّ ماشية بالقله , شافتها النخلة , قالت لها اسقينى يا زبربر , قالت لها أسقيقى من مية أمى المبخرة المعطرة .. روحى , راحت النخلة قال لها : يجعل طولى فى طولك , وفعلا بقيت طول النخلة , وراحت مشت شوية تانى لقيت الغراب , قال لها : اسقبنى يا زبربر , قالت له : اسقيك من مية أمى المبخره المطره , قال لها : روحى.. يجعل سوادى فى وشك , راحت فاتت ع الوردة , قالت لها : اسقينى يا زبربر , قالت لها : اسقيكى من مية أمى المبخره المعطره , قالت لها : روحى يجعل حمارى فى عينيكى , فبقيت عنيها حمرة قوى تخوف , راحت ماشية على أبو القردان الأبيض , فقال لها : اسقينى يا زبربر , قالت له : أسقيك من مية أمى المبخرة المطرة , قال لها روحى يجعل بياضى فى شعرك , فروَّحت زبربر للبيت وخبطت ع الباب وأمها فتحت لها الباب وماقدرتش تدخل منه لأنها طول النخلة وأمها لما شافت طولها وحمار عينها وبياض شعرها وسواد وشها إتخضت منها ومعرفتهاش وقالت لها : أنت مين ؟ , قال لا : أنا بنتك زبربر , والميه اللى إنت عايزاها أهه , ولما خدت الميه منها مقدرتش تطيق ريحتها وخدتها كبتها وقالت : طب أنا حابعت مديحة تجيب لى الميه من البح ,فراحت مديحة تملى لها الميه من البح , فكانت كل ما تقرب على البح البح يقرب عليها , لحد ما وصلت وملت القله منه , راحت ماشيه وهىّ ماشيه , شافتها النخلة وقالت لها : اسقينى يا مديحة , قالت لها : وطى واشربى , فقالت لها روحى يا مديحة يجعل طولى فى شعرك فشعرها بقى طول النخلة وجميل قوى , وهىّ ماشية شافتها الوردة قالت لها اسقينى يا مديحة , قالت لها : اتفضلى اشربى , قالت لها روحى يا مديحة يجعل حمارى فى خدودك , وهى ماشية عدت على الغراب , قال لها : اسقينى يا مديحة , قالت له : وطى واشرب , قال لها : روحى يا مديحة يجعل سوادى فى شعرك , وهىّ ماشية عدت على أبو القردان , قال لها : اسقينى يا مديحة قالت له : وطى واشرب يا أبو القردان , قال لها : روحى يا مديحة يجعل بياضى فى وشك , وهى مروحة للبيت كان فيه فارس راكب الحصان بتاعه وماشى وسط البلد , وقعت عينيه على مديحة عجبته قوى واتهوس بيها , ففضل ماشى وراها لحد ما روَّحت البيت , وصبح الصبح وراح تانى يوم عشان يخطبها , فراح لمرت أبوها عشان يطلب إيدها , فلما راح عند مرت أبوها قالت له : أنت عايز تخطب مين ؟ قال لها : أنا عايز أخطب واحدة جميلة قوى جل الله زين ما خلق وشفتها عشية وهى بتدخل هنا , فجابت له زبربر , وقالت له : ما فيش غير دى , قال لها : لع مش دى , قالت له : مفيش غير دى , راحت حابسه مديحة فى الطاقة , وقالت له: لازم تاخدها , وفعلا خدها وحطها على الناقة , وهو ماشى شافته النخلة ففضلت تقول : حط زبربر فى الطاقة وهات مديحة على الناقة , وشافه الغراب قال له حط زبربر فى الطاقة وهات مديحة على الناقة , شافته الورده قالت له : حط زبربر فى الطاقة وهات مديحة على الناقة , وشافه أبو القردان قال له : حط زبربر فى الطاقة وهات مديحة على الناقة , فراح رجع البيت تانى وراح بص فى الطاقة لقى مديحة , قام طلعها وحط مكانها زبربر وقفل عليها الطاقة , وحطها ع الحصان لبيض ومشوا , وعاشوا فى قصره فى تبات ونبات وخلفول صبيان وبنات .. " | |
|
