admin
Admin
عدد المساهمات : 2245
نقاط : 4031
تاريخ التسجيل : 14/05/2009
الموقع : تنمية مهارات العمل الاعلامى
 |  موضوع: قمر الزمان  الإثنين 12 أكتوبر 2009 - 9:34 | |
| فى يوم من الأيام , كان فيه تاجر غنى , وما غنى غير الله , والتاجر ده معاه واد إسمه قمر الزمان , فى يوم دخل قمر الزمان على أبوه وقال له : يا أباه , أنا عايز أسافر فى بلاد اللاه , عايز أتاجر هنا وهناك عشان أعرف الدنيا كويس , قال له : يا ولدى إنت لسه صغيَّر على السفر والشغل والبهدله دى , إحنا دلوقت حانجوزك وبعدين لما تكبر شوية وتقدر على السفر إبقى سافر واعمل اللى انت عاوزه , الواد ما سمعش كلام أبوه وبعد كام يوم جه واخد كام حتة دهب من ورا أبوه وسافر , أصلى الفلوس فى الليام دى كانت عبارة عن دهب , المهم إن قمر الزمان جاب حزام وحزم بيه الدهب اللى معاه على وسطه ومخلاش غير حتتين قليلين عشان يصرف منهم , مرت الأيام وهو ماشى فى الطريق , وف يوم طلعوا عليه قطاع الطرق وخدوا منه القرشين اللى كانوا معاه فى جيبه ( اللى هما حتتين الدهب يعنى ) , وما عتروش على الحزام المحزوم على الدهب اللى فى وسطه , وبعد ما خدوا منه حتتين الدهب سيّبوه , وفضل قمر الزمان ده ماشى فى البلاد تشيله بلاد وتحطه بلاد , لحد ما رسى على بلد ودخل فيها عشان يشترى دخان , بص قمر الزمان بعينه لقى الطريق فاضى ومافيش ناس واصل , غير الراجل اللى واقف من جوّه الدكان , قرب منه وقال له : يا عم الحاج , هىّ البلد دى فاضية كده ليه ؟! , قام الراجل دخّله من جوه الدكان , وقال له : باين عليك يا ولدى إنك غريب , البلد دى بتملكها ملكة من الجن ومعاها أربعين جنى , منعوا أهل البلد من الدخول والخروج , غير بإذنها , والغريب اللى عما يشوفوه , بيتلم عليه لربعين جنى ويقطعوه أربعين حته , أنت ياولدى تاخد بعضك وتمشى , البلد دى ما تنفعكش , راح قمر الزمان ركبه الغرور ومارضيش يمشى , ودوّر عن بيت يسكنه ,المهم إنه جَمَع بيت واتأجره وكان البيت جنب بيت ملكة لربعين جنى اللى قال له عليها الراجل , بعد ما أجر البيت , والبيت ده كان بتاع واحد جواهرجى , الجواهرجى شاف الخاتم الألماظ قوم عجبه , والخاتم كان غالى قوى وقال له : ما تبيع لى الخاتم ده , قمر الزمان مارضيش يبيعه واصل , الهيادى الريادى عافر معاه , لحد ما وافق قمر الزمان بس بشرط , قال له : إيه هوّ الشرط ده , قال له : الشرط هوّ إنك تعمل لى سلسلة من الدهب وتكتب عليها "لاإله إلا الله محمد رسول الله " , وافق الجواهرجى , وقال له : طب فوت علىّ بكرة , وفعلا فات عليه بكرة لقيه عمل السلسلة ومكتوب علها "لاإله إلا الله محمد رسول الله " قال له انا عايز شكل الكلمه دى صغيره قوى عن كده قال له طب سيب بكره وتعالى بعد بكره ساب بكره وجاله بعد بكره وقال له : فين السلسله ؟ قال له انا عملتها بس لسه مطلعتش من المكان اللى هيَّ فيه ، وتعالى معايا البيت تاخدها وتمشى راح معاه وأول ما لقيه شايف كلمة لا اله الا الله عاجباه قوى قال له : خد وعطاه حتتين دهب كبار قوى وقال له خد حتة الدهب دى ليك واعمل لى انا حتة الدهب دى قال له ماشى وفرح قوى الجوهرجى واتصاحبوا مع بعض وقال له الجوهرجى تعالى اتعشى معانا على العشا وفعلاً راح اتعشى معاهم على العشا وبعد ما اتعشى وغسل ايده شافت رئيسة الاربعين اللى هيَّ مرات الجوهرجى قمرالزمان وعجبها قوى , بعد ما عجبها قعدت تشاغل فيه ومنا منا لحد ما عملت رئيسة الاربعين علاقه معاه فكان جوزها عند ما ينزل يروح المحل بتاعه تاجى رايحه لقمر الزمان ومره ورا مره لحد ما قالت له : كده يا قمر الزمان ماينفعش عشان لو جوزى عرف بالعلاقه دى هيموتنا احنا لتنين قالت له: فا انت ممكن تعمل سرداب أنزل فيه من القصر من عندى آجى فيه القصر عندك , المهم جه الناس وعملوا سرداب تحت الارض يوصل من القصر بتاع قمر الزمان لقصر رئيسة الاربعين , المهم راحت رئيسة الاربعين قالت له: انت تعزم جوزى عندك وانا هاكون عندك قال لها: ازاى ؟ قالت له: ملكش دعوه المهم جه عازم الجواهرجى عنده وهيَّ قاعده عنده ولابسه فستان مشافوش عليها جوزها قبل كده , المهم راح الجواهرجى العزومه, وشاف الست اللى لابسه الفستان وقال فى باله: دا الست دى شبه مراتى بالظبط , لكن مراتى سايبها فى البيت وعُبال ما طلع من القصر عشان يروح القصر بتاعه كانت هىَّ وصلت القصر بتاعها من خلال السرداب وأول ما وصل جوزها لقيها موجوده فى البيت , فعند ما وصل البيت قالت له: انت لسه طالع , إيه اللى جابك تانى هيّ الحفله خلصت ولا إيه ؟ قال لها هوه انتى متنقلتيش خالص من هنا , قالت له : أنا لا طلعت ولا دخلت وقال فى باله : الله ما اخزيك يا شيطان , ولكن هوَّ قال فى باله : إزاى انا هناك وهيَّ هناك وآجى ألقاها هنا , المهم رجع الحفله تانى وشاف اللى شافها فى الأول اللى شبه مراته, فرجع تانى البيت وعُبال هوّ ما رجع البيت كانت هي رجعت من السرداب اللى تحت الارض وقال لها : أنا شفت واحده زيك بالظبط فى الحفله, فقالت له: يا راجل انا قاعده مكانى متحركتش, المهم قعدت رئيسة الاربعين تروح عند قمر الزمان عدة مرات وجات فى يوم من الأيام قالت له: ياقمر الزمان الكلام ده ماينفعش فرد عليها وقال لها: أُمال إيه اللى ينفع قالت له : احنا نهرب مع بعض من هنا , قال لها : نمشى نهرب مع بعض من هنا فى الصبح , وعند ما جه الصبح وجه الجواهرجى ماشى , فجه قمر الزمان واخد رئيسة الاربعين على الحصان فضلوا ماشيين ماشيين لحد مارجعوا لبلاد ابوه وعند ما وصلو البلد بتاعته اللى تربى فيها وعند ما وصل الىالبيت قال له ابوه : مين دى يا قمر الزمان فقعد قمر الزمان حكى لابوه الحكايه فقال له: ابوه يبقى انت وخدها من جوزها وهربت بيها فرد قمر الزمان على ابوه وقال له: انا بحبها يا ابوى فراح ابوه سكت , المهم جوز رئيسة الاربعين لما وصل البيت عرف انها هربت مع قمر الزمان ففضل يسأل فى البلاد وبلاد تشيل وبلاد تحط لحد ما وصل لبلاد التاجر فراح الجواهرجى دخل على أبو قمر الزمان وقال له : ابنك خطف مراتى يرضيك الكلام ده قال له مراتك فى الحفظ والصون وهىَّ قاعده عندنا فوق اطلع لها , وجه مطلع لهم أكل وشُرب , وحب ان يصالحهم مع بعض ولكن عند ما شكشك الصبح جه الجواهرجى مموِّت مراته وكان هيروح يهرب لكن فجأة دخل عليه التاجر وخاف انه يموته هوَّ كمان فراح قال له : احسن حاجه انك موَّتها , وانت كده راجل حُر ولو كنت خدتها ومشيت كنت انا اللى هموَّتك ولازم تقعد عندنا أسبوعين نضايفك واثناء ما هوَّ قاعد فى البيت شاف أخت قمر الزمان آخر جمال وعجبته وطلب ايدها من ابوها ووافق واتجوزها وعاشوا فى تبات ونبات وخلفوا صبيان وبنات "
| |
|
