كُلُّه وارد
وأنته قاعد تبقى شارد
تلقى همَّك من عِيالك
تلقى حقك ضاع ومالك
تلقى نفسك مره وحدك
وانته مفصول عن أمالك
تلقَّى هم الدُّنيا جالك
ليك يطارد
كُلُّه وارد
ينكتم صوتك ف قلبك ويَّا همسك
تبقى مش طايق سعادتك يوم تلامسك
تقوم تكلِّم مره نفسك
وتهادنها أو تعارض
كُلُّه وارد
تحسك نفسك مره وحش
ومره جحش
بس جحش دا افتراضى
تلقى نفسك مره هادى
ومره تلقى صوت مُعارض
كُلُّه وارد
يوم تهِّف عليك حكايه
أو تكسَّر يوم مِرايه
تبقى ماشى وفجأه واقع تنكسر
وتبقى محطوط ف العنايه
أو فجأه تمسك
يوم ف حد
وتنقلب شيطان ومارد
كُلُّه وارد
لويعزمك فى مره حد
وتقولُّه جاى
أوتلقى نفسك مره عنتر
وملكش زى
أو تبقى عبله
بس هابله
وتنكسف أول مقابله
أوعى تبقى أعمى
متشُفش ضى
تحب تشرب مرة شاى
وتقول بلاش أنا عاوزه بارد
كُلُّه وارد
ممكن أقرب حد ليك
فجأه خانك
تلقى نجدة ربنا جاتلك مكانك
أو تلقى هم يمسك جفاك
ويقرصك يوم من ودانك
وتنخرص ويبقى مش قادر لسانك
وفجأة تلقى جالك رساله من عطارد
كُلُّه وارد
تبقى مش لاقى ساعات أكلك وزادك
قاعد بتندب محنتك أيه اللى زادك؟
تبقى قاعد بين ولادك
تلقى همك محنتك تكسر عِنادك
قول يارب تلقى متحقق مرادك
تلقى نازله عليك موارد
كُلُّه وارد
تبقى ماشى مره ترجع
تلقى مره بسمتك أحساس بيوجع
تكون بتضحك بس جواك هم فارد
كُلُّه وارد
==========
مستر/عطيه الخُضرى
الأربعاء 14 يوليو 2021 - 17:02 من طرف admin
موضوع: كُلُّه وارد 
