دام نهرها موجود ميهزهاش الساقيه

دام نهرها موجود
ميهزهاش الساقيه
مصر باقيه
ولاعمرهم هيقولوا مش لاقيه
طول عمرها بتجود
وعن عيالها تذود
ارضها عفيه
ميهمهاش الدود
وقلبها صلب
ميأثر فيه بارود
عمرها ما كلت
ولاعمر كان دمعها
فى يوم ع الخدود
محفوظه من ربها
يا بختها
مين قدها
مين زيها
طول عمرها بتسود
لو بين عيالها تعالب
بارعين فى كل مقالب
هيفضل مكرها غالب
وديل الكلب هيتعدل
من غير رباط ولا قالب
يارب يا ستار
غير سترها مش طالب
يارب اللى يمكر بمصر
انته عليه غالب
مصر كلها موجب
ميهماش السالب
مادام فيها الاسود
لو يوم احوالها ساءت
او حتى مره تاهت
وسنين العجاف فكرت
مره تانيه وجاءت
سواء ابت ام شاءت
مسيرها بقوه تعود
وتعود كمان راقيه
دام نهرها موجود
ميهمهاش الساقيه
مصر باقيه
ولاعمرهم هيقولوا مش لاقيه
ياللى بتخونوا العزيزه فوقوا
اقولكوا وتصدقوا
تقطعوا او تحرقوا
تنصبوا او تسرقوا
او بالفتن تتشدقوا
مسيركوا يوم تتدقدقوا
ومهما يكون الظرف
ولادها ما يتفرقوا
ولاعمر جدرانها هيتشققوا
واحنا عايشين
ومسيركوا تتحققوا
حطوا فى بالكم لما تغضب
بيكون غضبها شديد
ومسيركوا تتمزقوا
مش بس تتهزقوا
كلنا من نبت طينها
مش غرب عنها
بيعز علينه دمع عينها
وبندعى ياربنا عينها
محنش عصابه كنا حاكمينها
ولاعشنا يوم فى مراقيا
دام نهرها موجود
ميهزهاش الساقيه
مصر باقيه
ولاعمرهم هيقولوا مش لاقيه

رائع وجميل هذا العشق للوطن
دام ابداعك استاذى

» ربنا موجود
» اخى محمد البلقين اطمئن اخوك موجود
» أأأأ انه من غير الائق أأأأأ ان نقول عن الله سبحانه وتعالى ((انه موجود ))
» @@ فلسفات @@ ايامنا خمس يوم مفقود/مشهود/ مورود/موعود/موجود/ ومساؤكم سكر
» @@ اعجازات @@ وكاله ناسا تكتشف مكانس تكنس السماء وكل هذا موجود فى القرأن الكريم