((( الدرس انتهى لموا الكراريس))) الجميل احمد عمار وادى الشعر

الدرس انتهى لموا الكراريس..

كان درس عويص..

على كل المخابيل الملاحيس..

والدرس انتهى لموا الكراريس..



كان أول كلمة ف درس اليوم..

تحيا الحرية.. يا رب تدوم..

ونقول للنايم: صح النوم..

والدرس انتهى لموا الكراريس..



والكلمة التانية.. العدل يسود..

لا هتفرق بيض.. ولا يفرق سود..

ولا عمر الظلم ف يوم هيعود..

والدرس انتهى لموا الكراريس..



والكلمة التالتة.. شباب وكبار

الكل بيمسح ذل وعار..

عاش فينا سنين.. واحنا الثوار..

والدرس انتهى لموا الكراريس..



وخلاصة درس اليوم: عاشقين..

ضيك يا بلاد النيل.. حالفين..

لنعيش في النور.. وبلادي الغالية ف نن العين..

والدرس انتهى لموا الكراريس..

[b]

واضح خلاص..

الدرس لسه مانتهاش..

وان الغباء..

غطى قلوب كل اللي قاعدين ع الكراسي..

ومنفوخين..

متعنطزين..

فاكرين بإن الكرسي باقي للخلود..

وان الوطن أصبح مايعرفش الصمود..

يبقى خلاص..

الدرس لسه مانتهاش..

هنعيد كمان..

الدرس أول كلمة فيه:

عايزين نسيم حرية بترفرف هنا..

فوق أرضنا..

هنعيد كمان..

الدرس تاني كلمة فيه:

العدل هو حلمنا..

يصبح سمانا كلنا..

هنعيد كمان..

الدرس تالت كلمة فيه:

فات الأوان..

واحنا مكاننا ف الميدان..

ونقول كمان..

مش راح نلم الكراريس..

أصل الحقيقة..

الدرس لسه مانتهاش..

واضح.. خلاص..[b]