مِليُون مَبرُوك يا مصر ع الحريه والعدالة

مِليُون مَبرُوك يا مصر
ع الحريه والعدالة
وألف رحمه ونُور ع الندَّاله
وهَارد لك
للفلول عنوان السَفَاله
مليار مبروك يا مصر
اتحقق الحلم الكبير
ولادك يا مصر مبيعرفوش استحاله
يكفى غُنا
حان البُنا
انته وأنا
وكلنا
مع بعضنا
عايزين نخلى مصر
فى احلى حاله
احنا هنا
وبقالنا صوت
وعشان ترابك يا غاليه
نتحمل نموت
لاننا رجاله
بقالنا رأى
ووجهة نظر
محنش كِماله
محدش فينا خاين
ولا باع البلد
وكان م العِماله
محدش هيبقى عاطل
أو يماطل
او يساعد على الباطل
كلنا طاقات وشغَّاله
شوف يا ريس
أوعاك تطنش حد فينا
كل فتره
شَقَّر علينا
بنظره أو اطلاله
خليك صبور
على مصرنا دايما غيور
من غير غضب ولا انفعاله
اوعاك تتكبر علينا
لله الكبرياء والجلاله
سبحانه وتعالى
والشيطان ليه حبايل
والوضع مايل
وكل مصرى فينا شايل
الملك زايل
والكرسى زايل
تعرف كده
راح تبقى هايل
والنضافه ميهمهاش
حبة زباله
احنا فى العصر الحديث
معدش فرعون له وريث
ولاعاد خسيس
ولا عاد حرامى
هيخلى البلد
تبدأ التفليس
طالع مننا جيل
من انضف سُلاله
مينضحكش تانى عليه
ولا حدش هيلعب بيه
لاننا ولاد الهرم
رمز الاصاله
ويوم ما يسوقنا ريس
راح نرغمه ع الاستقاله
كلمتين قُلتهم
من فرحتى وف عُجاله
====
عطيه الخضرى
قلين / كفر الشيخ