د. محمد عبد المطلب جاد
عدد المساهمات : 473
نقاط : 702
تاريخ التسجيل : 02/07/2009
العمر : 71
الموقع : odabasham.net
 |  موضوع: إديها نوم (1)  الإثنين 10 أغسطس 2009 - 19:52 | |
| إِدِّيْهَا نُوم
يا سَيِّدى يا محترم ياللى انت ساكن فى الهرم
واحنا هنا ساكنين بولاق
إزَّىِّ حال الزيت معاك ، والسمنه والسكر حداك
وازَّىِّ حال كيلو الدقيق ، والرز والفول للعليق
وازَّىِّ حال كيلو الفراخ
اللحمة موش بتهمنا ما انت واكلها عننِّا
دى حتى معدتنا بتتعب مِنِّهَا
ويجيلها انتفاخ
أنا ليه بفكر فيك كده؟ واتعب دماغى ف كل ده ؟
هيه خلاص متحدده ، لو مُخِّى من تفكيره داخ
وبدال ما الاقى دماغى طق
وبدال ما اناحى فى آى ولأ
وحياتى تبقى ماشيه زق
هَرْمِى النَّكَدْ وادِّيْهَا نوم
هّْدِّيْهَاَ حَبِّةْ فَرْفَشَهْ
وادِّيْهَا نوم
هَادِّيْهَا ضِحْكَه تِرِنْ وتْشِيْل الهموم
هاديها حبة بلبطه
فى بحر التأمل
فى الفراغ من غير هدف
وادِّيْها طَلَّه فى السَّمَا واعِدْ النُّجُوم
هاديها فُسْحَه من المشاكل والهموم
إنتَ حَدَاك أجْمَلْ بيسين
وانا عندى طِشْت وفيه هَعُوم
وادِّيْهَا نوم
**
يا سيدى يا محترم ياللى انته ساكن فى الهرم
واحنا هنا ف تُرَبِ الغفير
إنتَ حَدَاك الخير كتير
واحنا حَدَانا الجوع وفير
إنتَ حَدَاك ثلاجه أوْضَهْ
بحالها واحنا حَدَانا زِيْرْ
إنت حداك مستشفى سوبر
واحنا بنموت ع الحصير
إنت حداك نومة ملوك
واحنا هنا من غير سرير
إنتَ فى جنة أرضنا
واحنا فى نارها بنستجير
أنا ليه بفكر فيك كده؟
وابقى حقود بالشكل ده؟
هيه خلاص متسدده
متسنتره فى حجر الكبير
وبدال ما الاقى عقلى طار
وبدال ما اناحى ليل نهار
وحياتى تبقى حمره نار
هرمى النكد واديها نوم
هديها حبة فرفشه
واديها نوم
هاديها ضحكه ترن وتشيل الهموم
هاديها حبة بلبطه
فى بحر التأمل
فى الفراغ من غير هدف
واديها طله فى السما واعد النجوم
هاديها فسحه من المشاكل والهموم
إنت حداك أجمل بيسين
وانا عندى طشت وفيه هعوم
وادِّيْهَا نوم
**
يا سيدى يا محترم ياللى انته ساكن فى الهرم
واحنا هنا ف عِشَش الصَّفيح
إنت حداك الكون مُرِيح
واحنا هنا ف منظر قبيح
إنت حداك كل الهَنَا
واحنا هنا المستور جريح
إنت ف عمار وبَغْدَدَه
واحنا هنا فى خراب فصيح
إنت الخميره بتسندك
واحنا ف خراب زى الشعير
إنت بتنعس فى الأمان
واحنا فى خوف ملوش نظير
أنا ليه بفكر فيك كده وابقى غِتِتْ بالشكل ده
هِيَّه خَلاص مِتْعَوِّدَه تطلع مع الوَضْعِ المُرِيْحْ
وبدال ما الاقى عقلى شَتْ
هِوَّه أّخَدْ وانا ما خَدْتْ
وحياتى تبقى نَكَدْ وهَتّ
هَرْمِى النكد واديها نوم
هديها حبة فرفشه
واديها نوم
هاديها ضحكه ترن وتشيل الهموم
هاديها حبة بلبطه
فى بحر التأمل
فى الفراغ من غير هدف
واديها طله فى السما واعد النجوم
هاديها فسحه من المشاكل والهموم
إنت حداك أجمل بيسين
وانا عندى طشت وفيه هعوم
وادِّيْهَا نوم
**
يا سيدى يا محترم ياللى انته ساكن فى الهرم
واحنا هنا ف سَكَنِ الإيواء
انته مُنَعَّمْ فى الرِّوَاق
واحنا بِنُلْبُصْ فى البلاء
إنت بتلعب بالفلوس
واحنا هنا ف فقر وخناق
إنت واكلها مولعه
وانشاللا كل الكون ما داق
إنت معاك كل النفوذ
احنا خناقنا وإيْدْنَا ضاق
إنت المَلِكْ ايه يمنعك ؟
واحنا عبيدك باتفاق
أنا ليه بفكر فيك كده وابقى نِكِدْ بالشكل ده
هيه خلاص مِتْاَبِّدَه مالهاش طلاق ولا عِتَاقْ
وبدال ما الاقى نفسى مُتْ
واللا ف موريستانهم سُكُنْتْ
لا انا اللى نُلْت ولا اللى عِشْتْ
هرمى النكد واديها نوم
هديها حبة فرفشه
واديها نوم
هاديها ضحكه ترن وتشيل الهموم
هاديها حبة بلبطه
فى بحر التأمل
فى الفراغ من غير هدف
واديها طله فى السما واعد النجوم
هاديها فسحه من المشاكل والهموم
إنت حداك أجمل بيسين
وانا عندى طشت وفيه هعوم
وادِّيْهَا نوم
**
د . محمد عبد المطلب جاد
أستاذ سيكولوجيا الإبداع المساعد – جامعة طنطا
| |
|
nana222
عدد المساهمات : 267
نقاط : 640
تاريخ التسجيل : 30/06/2009
| |
د. محمد عبد المطلب جاد
عدد المساهمات : 473
نقاط : 702
تاريخ التسجيل : 02/07/2009
العمر : 71
الموقع : odabasham.net
| | موضوع: رد: إديها نوم (1) الثلاثاء 25 أغسطس 2009 - 1:59 | |
| - nana222 كتب:
شوكأنك دست على الجرج
ربنا معانا ويعين الجميع
صور واقعية ومصداقية فى التعبير والتصوير
اشكر سعادتك[i]  شكرا يا نانا الله يجبر خاطرك كل عام وانت بخير ترعاك عين الله يا ابنتى | |
|
