قوللى بس هتعمل ايه

لما تكتر الهموم
لما الديون تكتر عليك
وكأنها ف جسمك سموم
لما يعز عليك النوم
لما تحس انك وحيد
ملكش ف العالم لزوم
ينخرص صوتك ف حلقك
وتبقه مش قادر تزوم
لما متلاقيش حِنيِّن
يمد ايده ينجدك
وقت اللزوم
لما تعرف
اى حال م المحال
يستمر او يدوم
لكن فقرك مقتدر
قاعد معشش
لكنه ناوى
فوق قلبك يدوم
لما متلاقيش هدوم
لما يعز يوم عليك
تمن الرغيف
صابر وراضى بالمقسوم
لما تسعى ف كل وادى
تصرخ تنادى
حد ينجدنى يا ناس
ولاحد يسمع
ولو سمع حد فيهم
متلاقيش
غير انه يسخر عليك ويلوم
لو مصَدَّع ومش لاقى العلاج
ولا حتى لاقى تدفع تمن
حبايه لو مزكوم
قول يارب قادر بكرمه يطعم المحروم
ويستر المهموم
ويفرح المكلوم
قوللى بس هتعمل ايه
لما مش هتلاقى نفسك
لما هتضيع يوم حياتك
لما مش هتلاقى زاتك
لما تموت قدام عنيك
وبسهوله كل امنياتك
لما مش لاقى حاجاتك
لما تكتر يوم همومك
لما يبعد يوم خِواتك
لما تنذل لذليل
وذلتك مش من صفاتك
لما الكفاف منتش لاقيه
قوللى بس هتعمل ايه
لما تكتر يوم عليك
كل الديون
لما تنذل لصديق
لما نفسك يوم تهون
لما تتحجر دموعك
م البكا جوه العيون
لما اللىواثق فيه تأمنه
يفضحك ويعرف يخون
لما تحكى يوم حكايتك
لاى حد تتصوره
انسان ملاك
يسخر وبيسىء الظنون
لما ينول الهم منك
ويذلك الفقر الملعون
ولاانته قادر تقتله
ولافيه أمل هيعدِلُه
أو حتى ستر يبدله
عايش و ميت بيه
قوللى بس هتعمل ايه
اصبر ولح
بالدعاء اليه
قوللى بس هتعمل ايه