يا زعيم

يا زعيم

يا زعيم كان نفسى أقولك

عشت مليون عام كمان

بس انا باصبح ألفلف

فى الشوارع والميدان

لما اجيب العيش مكعبل

موش هقولك ع اللى كان

واللا اقولك، هوه ايه

لسه عندى ابكى عليه

يا زعيم تفوا فى وشى

جرجرونى وقالوا : إمشى

كانوا هينطوا فى كرشى

ويصلبونى ع الحيطان

لما بس ذكرت إسمك

وانى مسئول جوا حزبك

قالوا انى وقالوا إنك

وصف ما يجيش ع اللسان :

احنا هنلاقيها منكم

واللا من الأمريكان

حوش رجال أعمالكوا دولا

الأقسى من دود الغيطان

بعد مص الغصن الاخضر

ينحتوا عظم العيدان

**

يا زعيم مفجوع وساكت

لما شبت وروحى شاخت

واللى جايه واللى فاتت

كلها أيام هوان

أنت واخدنا فراعنة

أربعين مليون حصان

شوف بقينا ازاى فى إيدك

مسخوطين زى الديدان

موش كفايه كتمت صوتنا

ليه عاوزنا نجوع كمان

مين وصف لك إن جوعنا

هوه برك للأمان

مين شرح لك الانفتاح

إنه بيت من غير بيبان

خصخصة أيه اللى تدى

كل حاجه للشيطان

واحنا نقعد فى الشوارع

نفتكر أيام زمان

**

يا زعيم احنا غلابه

محصورين فى وسط غابه

وانت سلطت الديابة

ينهشونا عيان بيان

قوللى يا ملهم بلدنا

كل يوم بيقل زادنا

وانت قلت إن عددنا

هوه سر المزلقان

يعنى سر الأزمة إحنا

واحنا بإدينا اندبحنا

وأنت دايما بتصارحنا

إننا ننقص حفان

يعنى جوعنا ووقف حالنا

والخراب اللى جرالنا

كان مخطط لاختزالنا

لما نبقى ع الميزان

مية فاسدة وهرمونات

هندسة للماكولات

والسموم والموبيدات

كلها وصفة هامان

**

يا حبيب كل العتاولة

يا سند كل التنابلة

إحنا أبقى إحنا أولى

وإحنا مفتاح الأمان

دول سماسرة كل حاكم

همه دول أصل المظالم

واللى بيلموا الغنايم

وهربوا ساعة الطوفان

قول يا راعى البلطجية

واللصوص فى الأبعدية

سبت أيه للأغلبية

فى الأنا جر والطيجان

**

يا زعيم خليك فاكرنا

إحنا ما بعناش ضميرنا

ولا سيبنا خط سيرنا

مهما طال عقد القران

يا زعيمنا إحنا فى ورطة

وأنت عمال كل خطة

تحشى جوه جروحنا شطة

كيلنا فاض والعظم بان

يا زعيمنا الدنيا شاطت

والبلاوى ريحتها فاحت

واللى فاحت لسه فاحت

واللى ببنى ملوش مكان

**

الشباب م الجامعة تخرج

ما تلاقيلها أى مخرج

من سنين واليأس ياكل

عمرهم كرهوا الزمان

شوف طابور المدمنين

واللا جيش العطلانين

واللا شوف الهربانين

م المذلة والهوان

واللا شوف الفلاحين

اللى كانوا منتجين

- لما كان الشغل دين -

هجوا لبلاد الجيران

سابوا أرض عملها سيدى

بالعرق وصلت لإيدى

واتروت بعرق جدودى

أصبحت ما لهاش ضمان

واللا شوف عمال بلدنا

اللى خلوا الصنعة مدنه

لما شافوا الدنيا هدنه

سابوا كل المهرجان

عد أطفال الشوارع

لما يبقى الفجر طالع

ع الرصيف نايمين جواعى

محرومين طعم الحنان

اللى فوق كرتونة نايم

إيه اللى فيه ربه اللى عالم

واللى جنب الحيط مكروع

لما يصحى ع الأدان

واللى بات عريان وحافى

وانت أعلم باللى خافى

مين بيستغل غلبه

لقمة سايغة ف إيد جبان

واللا شوف البلطجية

ع النواصى ف كل حارة

كل يوم بنشوف ضحية

وأمن مشغول بالإماره

والمآسى هيه هيه

غير فولانه مكان فولان

**

يازعيمنا احنا فى كرب

كل دول مالهمش ذنب

آى نعم للناس دى رب

بس برضه ليها أب

خلى كله ياخد له جنب

وامسك انته الصولجان

نضف المركب بحالها

خلى مصر تشوف جمالها

عيد لأمجادنا جلالها

صفى صوت البرلمان

إقطع الإيد اللى خانت

كرم الإيد اللى صانت

خلى عزم الحق ثابت

لا اللى خان ذى اللى صان

لا اللى باع ذى اللى نمى

اللى كان شغال بذمة

لا اللى عاش صاين الأمانة

ذى فاجر بهلوان

أكشف المستور بحاله

والحرامى هات بداله

خلى كل الناس دى تعرف

اللى ضحى واللى خان

اللى كان حارس ترابه

واللى صهين واللى لان

ورى كل الناس طريقهم

رزقهم ، خيرهم ، راحتهم

الوطن دا بشوف بعينه

شوافاتى ما لوش ودان

اللى يدى الناس أمانهم

بالعدالة فى وطنهم

يحضنوه جوا حواشى

القلب يدوه النيشان

هو هدا اللى يخش بيتهم

ويصونوه جوا عيونهم

وان طلب يدوه هدومهم

واللى يكسب فى الرهان

**

يا زعيمنا مشكلتنا

موش فى حاجة لترجمان

احنا رعب الخوف واكلنا

خوف كسرنا وهد حيلنا

خوف مخيبنا ف أملنا

تحت سقف ملوش أمان

وانتوا عايشين فى قصوركم

والنعيم ساند ظهوركم

والأمان ساكن صدوركم

تحت عين الديدبان

إحنا موش لاقيين رغيفنا

مكشوفين فى وش ضيفنا

والغلا واكل كفوفنا

كل يوم بيزيد كمان

لا احنا عشنا بالكرامة

كنا أخدتنا الشهامة

وقولنا لو يوم القيامة

موش هنركع مهما كان

ولا فات عنق الزجاجة

اللى طال حتى السماجة

وأكلنا بالمعالق

من ذهب على قول فولان

العدالة بقت كماله

والمظالم فى الصميم

كلمة الحق فى زبالة

واللى قالها ف سين وجيم

والكرامة بقت محالة

جوا علبة "عسقلان"

إحنا لا نسينا اللى ماتوا

محروقين أو غرقانين

ولا ناسيين المقابر

واللى ساكنينها سنين

ولا شايفين شمس بكرة

فى خرم إبرة فى اللومان

**

يا زعيم ان كنت فاكر

إن داخليه وعساكر

يقدروا يهدوا البنادر

والكفور وتذيع بيان

إن كل الشعب قاعدة

وإننا بناخد مساعدة

من جهات كافرة وفاسده

وانتوا بتصونوا الإيمان

يبقى منتوش م البلد دى

ولا جربتوا التحدى

مين مصدقكم يا فندى

ما المخبى ظهر وبان

لعبة الألفية بانت

والعراق حطت ثوابت

والشعوب عرفت طريقها

والحقيقة فى السودان

**

يا زعيم أنا كنت فاكر

إنى لو أصبحت شاطر

لو بقيت عالم وماهر

هبقى فارس فى الميدان

التقيت إن الحقيقة

فاجرة وعنيها جريئة

وانها لعبة سريقة

والشريف ملهوش مكان

لا المسائل بالكفاءة

ولا حتى باللياقة

كلها لعبة حداقه

واننا بره الرهان

البلد محجوزة ليهم

والمصير كله ف إيديهم

واللى يحلو ف عنيهم

أو يخر من الكيعان

إنما عالم وحجة

يبقى مر وريحته فجة

محتمل يلقى له هجة

أو ليلاتى يبات جعان

**

يا زعيم الدنيا تشتى

أجرى واتلكفت فى خيشتى

وانت يامسود لى عيشتى

لسه ساكن فى الديوان

**

يا زعيم لما الأرانب

تترمى فى جيب الأجانب

نبقى شعب مالوهش صاحب

واحنا فى حالة جنان

العتاولة والقطط

شفاطين ياكلوا الزلط

هندسوا كل الخطط

للأوادم والمكان

هندسوها الأسطوات

بالقانون والمضبطات

قلوظوها لبطانتهم

تحت سقف البرلمان

**

يا زعيم كان نفسى أقول لك

عشت مليون عام كمان

بس شايف الدنيا ضلمة

والبلد تحت الطوفان

نفسى ما تزعلش منى

إنت كنت فى قلب ننى

لسه يوم ما دافعت عنى

جوا قلبى مهما كان

بس حزب الهباشين

حط إيده ع العجين

خلى كل سنينا طين

بهدلوك يوم الامتحان

**

أستاذ سيكولوجيا الإبداع – جامعة طنطا

محمد عبد المطلب جاد

فى عيد مولده 2009

زائر

مشاركه جميله جدا سلمت يداك

استاذى ومعلمى وشاعر الشعراء والاب الروحى لاحلى منتدى
اشرقت الانوار ياسيدى كم افتقدنا حضرتك
افتقدنا حروفك وكلماتك واشعارك وافكارك اخيرا اشرقت
الكلمات المنمقه والكلمات المعطره برياحين الادب والفن والتميز
والله العظيم المنتدى اذدان واحلوا وتزين بمداخله حضرتك واطروحتك
الجميله ولانك عالم نفس رائع ومتمكن امسكت بمشرطك النفسى
وخللت شخصيه الزعيم وكانك تشعر بمعاناه فقراء الشعب بدايه من
رغيف العيش (( المكعبل )) حس شعبى جميل واظهرت له مساؤه
وجبروته وطغيانه انا سعيد بمداخلتك الرائعه بعد اشتياق واستحلفك
بالله العلى القدير الا تغادر المنتدى لاحرمنا الله من طلعتك الادبيه المتميزه
واطلالتك النديه والمثمره ربنا يارب يمنحك السعاده والصحه والعافيه عافيه
الابدان وعافيه الاديان امين مولانا رب العالمين شكرا وحبا وتقديرا واحتراما

هذه الصفحات المعطره لها الاولويه[b]

زائر

مااروعك استاذى ومعلمى لاحرمنا الله من ابداعاتك وامتاعتك[b]

يااااااااااااااااااااااااااااااااااااااااااااااااه يادكتور محمد !!!!!!!!!!!!!!!!!
مكتوبة من سنتين ومخبيها وخايف
عندك حق
الحقيقة انت ابدعت فى تشريح حال مصر فى فترة من كان الزعيم
وتحدثت فيها بلسان المطحونين
انا شخصيا وجدت نفسى فى كل شطرات القصيدة وهذا ابداع ان تكتب لليجد الاخرون انفسهم وقد عبرت عنهم بشاعرية و بمشاعر المجرب الخبير
بارك الله فيك
وحشتناااااااااااااااااااااااااااااااااااااااا يا دكتوووووووووووووووووووووور

ما أروعك وأبدعك فى رؤيتك الصائبه لحال مصر

** أنا لو مسمحولى أسمى قصيدة حضرتك * هسميها وصف مصر أواخر القرن العشرين

والله تستحق عليها أكبر جائزه ووسام يقدم لشعراء بمعنى الكلمه مثل حضرتك

* وأرجوا من حضرتك متغبش عننا * حضرتك وأشعارك الراقيهوحشتنى جدآ

دمت سعيدآ متألقآ ومبدع دائمآ

لا حرمنى الله منكم أحبتى

ماذا ترون؟

هل خرجنا حقا من ظلمة القهر إلى نور الحرية؟

هل انتصر الخق ؟

الأفئدة يعتصرها المجهول ، والأنياب التى لم تزل تنهش جسم الحاضر والمستقبل .

حفظكم الله ورعاكم

(((والله بجد دى وش السعد)))

حبيبتى حفيدتى جات

ومعها جاء كل الاصدقاء

وهذا هو دكتور الشعراء

ابدع القول وفى الانشاء

طبتم وطاب ممشاكم

وسعدتم وسعد منتداكم
~~~~~~~~~

وحفظ الله بلدنا الغالى مصر

وكفانا مافات من سنوات قهر

ودائما النصر مع الصبر

وبعد كل عسر ياتى يسر

[/b]

زائر

شكرا لفخامتكم

********************
تلميذتك بالتربيه النوعيه نرمين وزمليها حسام وزوجها
*******************************[b]

ما شاء الله

اللهم لا تحرمنى احبتى

اللهم املأ ايامهم سعادة وباركها بقدرتك

اللهم امين امين امين

ياااااااااااااااااااااه يادكتور محمد
أوحشتنا كثيرا كثيرا
وأوحشنا معك الصدق الصافى والشعر الطيب الجميل
لطالما اشتقنا الى لحظات الصدق هذى.. فحياكم الله
وعودا حميداااااااااااااا

بارك الله فيك يا ابنتى

أتمها الله علينا خيرا بجوده وكرمه

تسلمى يا قرة العين

اللهم بارك قلبها الطيب وروحها العطره

وبارك عمرها واسعد أيامها وارزقها الحسنيين

اللهم ىمين آمين آمين

اين انت يا دكتور اصحى الساعة عدت الواحدة صباحا

بسم الله ما شاء الله

فعلا من اجمل ما قرات

سلمت يا دكتور ودمت مبدعا

تقبل ارق تحياتي