اما امبارح كان عندى فطار
قال ايه نار
حبه بميه كانوا صغار
وكام زتونه وعود خضار
كانت لمه
اكله صحيح
ممكن يتقال فيها اشعار
فضل ونعمه
يارب تديمها
ولاتحرمنا من لمتها
صغار وكبار
بنتى اميره تقوللى يا بابا
كان فيه حاجه بيسموها اللحمه
بارخص اسعار
كانت طعمه يا بابا بشكل
ومعاها الرز مدسوس
بيحلى الاكل
بعد ما تاكل بتقوم زنهار
رديت قلت اه يا نهار
لساك فاكره يا بنتى اللحمه
والله زمان نفسنا ناخد
صوره معاها
لجل الذكرى ف عيشه مرار
ردت شيماء بنتى الثانيه
جرى ايه يا بابا
موجوده اللحمه بس النفس
مش واخده قرار
واخوها يقول
طاب هاتها يا بابا
لو حتى تكون لحمه جرار
او لحم حصان او حتى حمار
بص يا بابا
مهما تقول
فى محاسن الفول
مش حيحوق فينا اشعار
فولك حلو وبصارتك حلوه
بس اللحمه يا بابا لحمه
لو مطبوخه او مسلوقه
او مشويه كمان ع النار
معاه الحق ماهو مش عارف
ان ابوه مش لاقى ايجار
ولا لاقى يبنى له دار
ولكن فى الاخر لجل عيونه
اخدت قرار
لما يكون ربنا كارم هجيب اللحمه
وهناكل علنى وسط الشارع
يمكن ييجى كمان زوار
راح نعزمهم يا كلوا معانا
لقمه هنيه تكفى كتير
لو كانوا كتار
ابعت لى يارب ثمن اللحمه
ونشوف ايه صار
والله حقيقه
مش فكره جات لى ف الاشعار
ربنا موجود هوه الغفار
هوه الرازق ليل ونهار
الاولاد ثارت ع الاكل
ربنا يبعت رزق الثوار
الأربعاء 14 يوليو 2021 - 17:02 من طرف admin
موضوع: اما امبارح كان عندى فطار 
