الطابور

[center]إلى أخى الحبيب الشاعر الرقيق مازن الشريف ردا على قصيدته

( تعالى يا صاحبى أحكيلك )

أقدم :

الطابور

الطابور يشرح ويحكى

ليه بيوتنا لسه خيش
احنا ننتج واللى ياكل
كل كرش ما يختشيش
احنا نتعب ، بُصْ فينا
فين تعبنا ما تلتقيش
احنا نتعب للخواجه
للأفندى ، للشاويش
احنا نشرب سِمْ هارى
وهوه يشفط فى الحشيش
احنا بابنا خرقه باليه
وهو بابه إزاز وشيش

احنا بيتنا فى الخرابه
هوه ده بيت الغلابه
التراب للجنب فرشه
والغطا جفن السحابه

والعروق فى إدينا ترعه
مَيَّه زَرْقَا من شقاها
عظمه ملفوفه بجلده
ناشفه خشنها ضناها
والبطون فى ظهورنا لازقَهْ
بعد ما طال انحناها

**
الطابور يشرح ويحكى
ليه بيوتنا لسه طين
ليه ولادنا احنا نَحَافَىَ
ودول سمان ومتختخين
ليه ابويا نخله مالت
خايخه دوبها الأنين
ليه اخويا ما التقاشى
حاجه فاتتها السنين
ليه بندبل واحنا لسه
فى شبابنا صغيرين

**
بكره لما الفجر يطلع
والغيلان السود تموت
إحنا نتنفس يا صاحبى
وقتها يموت السكوت
فى الساعه دى الشمس تطلع
نور على كل البيوت
والإيمان الحق يرجع
تانى من قلب التابوت
يومها صوت الحق يعلا
ويبقى للحرية صوت
فينا نور الفجر عايش
بس يفنى الأخطبوت
**
بالأمل عايشين يا صاحبى
والأمل سر الحياه
الأمل فى نور قلوبنا
الآتى من نور الإله
لا احنا دوبنا ولا انتهينا
وهوه وحده اللى نراه
له سجدنا وبيه صمودنا
وبين ايديه تحنو الجباه
كل ما فينا يا صاحبى
وعى عن إيمانه تاه
منه كان البدء وحده
وله مصيرنا ومنتهاه
**
دمت بخير أخى الحبيب
طنطا فى أولى ليلات القدر بالشهر الكريم
تقبل الله منا ومنك

تشريح دقيق للطبقة المطحونة
اجدت يا سيدى فى الرسم بالكلمات وفى التعبير

عبد الفتاح غنيم كتب:: تشريح دقيق للطبقة المطحونة
اجدت يا سيدى فى الرسم بالكلمات وفى التعبير

**
الله يجبر خاطرك

بسم الله الرحمن الرحيم

**
بالأمل عايشين يا صاحبى
والأمل سر الحياه
الأمل فى نور قلوبنا
الآتى من نور الإله
لا احنا دوبنا ولا انتهينا
وهوه وحده اللى نراه
له سجدنا وبيه صمودنا
وبين ايديه تحنو الجباه
كل ما فينا يا صاحبى
وعى عن إيمانه تاه
منه كان البدء وحده
وله مصيرنا ومنتهاه
**
الله الله
رائعة ياأبى
تعبر عن المعاناة التى نعيشها
لكنها تبين لنا أن الأمل هو الحل الوحيد للهروب من هذه المعاناة
كعادتك دائما يأبت تحدثنا عن الأمل ..
الأمل الذى يضىء كل ليل مهما اشتدت ظلمته
حقق الله لك كل آمالك ياشاعر الأمل
بارك الله فيك وفى إبداعك أبى الحبيب
لاحرمنا الله منك أبدا
تقبل مرورى وخالص تقديرى
ابنتك

الطابور Dk10_topimage

بارك الله فيك يا قرة عين بابا
ولا حرمنى ربى من لسانك الذى يقطر سكرا

» ترى/ ماهو الطابور القادم بعد طابور العيش والطماطم