يا ألف خساره ( بالعامية المصرية)

يا ألف خساره

يا حَبِّةْ عينى دى القُطَّهْ
بحاجه لإيد تلامِسْهَا
ولما تضِيقْ لسانها بَرِيىء
يدور ويلف يلحسها
دى حتى الطفله محتاجه
حنون يحضُنْهَا وِيْبُوسها

ودى حاجه ف جميعِ الناس
لقلب يكون حنون حساس
وعين بالعطف تُحْرُسْهَا
**
فى لحظه تكونِى محتاجه
لإيْدْ تِنْحَط على قلبك
وعاوزه تْحِسِّى فى الدنيا
بحالها بْحَدِّ بيحبك
تروح الروح ، لقلبُه تْبُوح
تِحِسِّى انُّه الدَّوَا جَنْبِكْ
ولمْسِةْ إيدُه على وِشَِّك
وهمسة صوتُه فى قُرْبِكْ
تخلى الكون ربيع دايم
وتفرحى بيه ويفرَحْ بِكْ
**
يا حَبَِةْ عينى كان لى جار
حنون وكريم وعنده حُمَار
ولما جارى مات ، صَمِّمْ
حُمَاُره ما يِبْرَحِ الدَّوَّار
فِضِلْ صايم لحد ما مات
ودى من عالم الأسرار
**
ما تِلْقِى الغدر غير فينا
ولا النُّكْرَان
ولا القَسْوَه ونار الظلم
والبُهْتَان
وتِلْقِى حنان كبير فى عالم الحيوان
برغم ان البشر ليهم كُتُبْ وبيان
وتوصيات بروح الرحمة والغفران
شوفينا الوقتى يا خساره
ما فينا رحمة الرحمن
**
يا حَبِّةْ عينى لمَّا الليل يِدَاِرينا
ونار الغدر والهجران تقيد فينا
ولما الوحده تحرقنا وتكوينا
ونبقى ف عالم النسيان
تلاقى الروح ف خنقتها
بحاجه للمسه من إنسان
وعين عماله بتقلب
صور تعذيبها ع الجدران
ودمعه حايره فى عنينا
بتروى قلبنا العطشان
وبِنْرََاجِعِْ شِرِيط الغدر والهجران
يا ميت حسره على الحيران
وألف خساره ع الإنسان
**
د. محمد عبد المطلب جاد
أستاذ سيكولوجيا الإبداع – جامعة طنطا[b]

» أيوب : قصيدة بالعامية المصرية من بحر الرمل
» حس الفكاهة فى الثورة المصرية
» إبراهيم خليل إبراهيم والفضائية المصرية