حضنك الدافى يا أمى

[center]
حضنك الدافى يا أمى

الليله دى
والنهارده كله
ليله ويومها نادى
غير ليالى العمر كله
غير ساعات العمر كله
شىء جديد موش أمر عادى
قولى قلبى بيتولد لسه الليله دى
وابتدا بس الساعة دى
يوم ميلادى
**
يا منى عينى يا أمى
يا نغم سارى فى دمى
يا دوا شال كل همى
يا هنايا وكل حلمى
لما إيدك بس تلمس
وشى وتبدد سهادى
لما صوتك يملا ودنى
بالحنان ساعة رقادى
لما اقول إسمك ولما عليه أنادى
**
آه يا أمى ع اللى محروم م الحنان
آه يا أمى ع اللى فارق
عطف أمه من زمان
آه يا أمى ع البكا
فى الوحدة من غير قلب أمى
**
أيه يا أمى السحر ده اللى مس قلبى؟!
أيه يا أمى العطف ده اللى لقيته جنبى؟!
ياه يا بحر من الحنان عندك يا أمى
**
قولها تانى ، قلتها : "يانن عينى"
فاض حنانك ضمنى ودوب أنينى
داب فى أحضانك حنينى
من همومى إغسلينى
نفسى على رجلك أنام حبه يا أمى
**
كنت فين؟
أنا كنت فى الحرمان سجين
كان منايا حضن دافى ولمستين
كان منايا عينى تتلاقى فى عيونك
واروى قلبى يا شفا القلب الحزين
داوى روحى من الضنى بإيدك يا أمى
**
بكره جاى ؟
دا أنا قلبى هيدق الثوانى
وارتمى فى حضنك ولا ينطق لسانى
قلبى يسمع دق قلبك له معانى
لو كلام الدنيا ما يقوله يا أمى
**
يا حنان بيشع رحمه فى الخلايا
يا دفا قلبى الحزين ليلة شتايا
يا بدايتى ورحلتى لحد النهايه
نفسى طول الوقت اشيل قلبك معايا
يملا نفسى بالأمان وارتاح يا أمى
**
د. محمد عبد المطلب جاد
أستاذ سيكولوجيا الإبداع – جامعة طنطا

الله
أكثر من رائع
ومشاعر أكثر من فياضة
وتعبير عن حالة حب فى أجمل صورة
فبوركت يا أبى
وطبت وطاب قلمك
لك خالص شكرى وتقديرى واحترامى
حضنك الدافى يا أمى 2

لا حرمنى الله منك يا قرة عين أبيك
ازدانت بك قصيدتى
ترعاك عين الله يا ابنتى