د. محمد عبد المطلب جاد
عدد المساهمات : 473
نقاط : 702
تاريخ التسجيل : 02/07/2009
العمر : 71
الموقع : odabasham.net
 |  موضوع: لحظة هروب (3)  الثلاثاء 7 سبتمبر 2010 - 9:32 | |
| لحظة هروب 3
يا عباب البحر قول
فى كل قطره مين انا
يا رمال البحر شيلى
من حرارتى سوسنه
واوصفى شوقى اللى عايش
بين ضلوعى من سنه
شيل يا موج البحر خفقاتى
وقولها دندنه
وصل الدقات يا موج
وافرش العالم مروج
وابعت النسمه تعطر
وش دبلان م الضنا
روح وحط بإيد حنانك
مطرح الهم الهنا
**
الله يزيد قلبَكْ صفا
ويخللى شطك كله نور
الله يزيد قلبك دفا
يا سايعنى يا أغلى البحور
**
يا بحر خُدْ منِّى حنينى للُّقا
سيبه يا بحر فى حضن قلبك ينسَقَى
خليه يدوِّبْ فيه مرار كل الشَّقَا
واعطف عليه يا بحر مين غيرك بَقَى
**
يا بحر لو تعرف أنا ع الشطِّ ليه ؟
لو تعرف اللى ف قلبى ومدَارى عليه ؟
يا بحر ، أمى فى العذاب بتقاسِى ليه ؟
ومعاها قلبى وانا هنا موش دارى بيه .
**
يا بحر انا خانِّى الوطن ، خانِّى السكن
خانِّى البدن ، خانِّى الرغيف اللى اتعجن
خايف يا بحر العدوى توصل للكفن
لو ما اتسع يا بحر صدرك بالحنان
فيه قلب رب رحيم يا بحر اسمه الأحَنْ
**
قوللى يا بحر أروح لمين لما اتخنق ؟
بدموع بتحرق والقى حلقى مفيهش ريق
كان صدر أمى يا بحر أبدع ما خلق
شط الأمان ، باب الأمل يطفى الحريق .
**
إفتح لى يا بحر الأمل باب الحنان
خليه يا خودنى م المذله والهوان
خليه يمس برحمته قلب الشقى
ويحط فيه العطف يعطيه الأمان
**
يا بحر علمنى الأنين
أبكى ما يطلع لى طنين
كل اللى جنبى قُرَيِّبين
ما يبقوا فيِّا شمتانين
علمنى أمشى ازاى وابان إنى سعيد
علمنى أبدأ كل يوم واحد جديد
لا الدمع دوب لى جفون
ولا وشى فاضحاه العيون
ولا ريقى علقم م عذابى وم الظنون
علمنى اعيش فى قبر أحزانى وحيد
**
يا بحر انا حزنى ما يوسعلوش مَدَاك
أنا بس بآجى أبوح واطَفِّى النار حَدَاك
أنْفَكِّ من همى معاك
علشانى عارف انَّكْ ملاك
باجى أحِسِّ بلمستك لحظة صفاك
**
د. محمد عبد المطلب جاد
أستاذ سيكولوجيا الإبداع - جامعة طنطا
شكرا لمنتهى أملى إذ ذكرتنى بهذا الألبوم ( 25 قصيدة )
| |
|
