رساله الى السيد الرئيس
رئيسنا الحبيب
من بعد التحيه والسلام
والمحبه والأحترام
أعذرنى لو خانِّى الكلام
بس أنا مفجور يا ريِّس
وياريت رسالتى توصلك
وتحظى منك بأهتمام
++++++++++
أنا جاى أكتب لك ياريس
عن كل مسئول ف البلد
عن كل فاسد يوم همل
عن كل معدوم الأمل
وعن فقير من غير عمل
واللى جيبته ف الحياه
راكبه لجمل
واللى وضعه مستحيل
غير مُحتمل
واللى حلمه مات يا ريِّس
ولامره له حلم أكتمل
ومات بقسوه ف الزحام
رئيسنا الحبيب
من بعد التحيه والسلام
والمحبه والأحترام
أعذرنى لو خانِّى الكلام
بس أنا مفجور يا ريِّس
وياريت رسالتى توصلك
وتحظى منك بأهتمام
++++++++++
يرضيك يا ريِّس ناس تجوع
وناس تبات جوا الألم تبكى الدموع
يرضيك يا ريِّس
يبقى هم الدُّنيا ساكن ف الضلوع
يرضيك يعيش الناس ف ذُل
وف خُضوع
شمس الأمل غابت ياريِّس
ومعدش ليها يوم سُطُوع
والحلم اللى كُنَّا بنحلمه
شايفينه بيضيع
فى كل لحظه من غير نهايه او رجوع
والنبته ماتت ف الاراضى
جفت منابع نهرها ويَّا الضُروع
معدش فيها غير حُطام
رئيسنا الحبيب
من بعد التحيه والسلام
والمحبه والأحترام
أعذرنى لو خانِّى الكلام
بس أنا مفجور يا ريِّس
وياريت رسالتى توصلك
وتحظى منك بأهتمام
++++++++++
طول عُمرنا كُنَّا أعزه
طول عُمرنا قامات يا ريِّس
شُفناك أملنا
وقلنا مُخلص أنسان كويِّس
بس ليه ناس الغلابه
سايب هموم الدُّنيا
تاكل ليه عظامهم والدِّيابه
يعمل أيه بس الفقير
فى وسط غابه
فاكسات كتير بعتناهالك
ولافاكس منهم يوصلك
ولانافعه شكوى أو كتابه
من كُتر شدة كربنا
أنقطع حتى الحزام
رئيسنا الحبيب
من بعد التحيه والسلام
والمحبه والأحترام
أعذرنى لو خانِّى الكلام
بس أنا مفجور يا ريِّس
وياريت رسالتى توصلك
وتحظى منك بأهتمام
++++++++++
بيك مُباشر من غير وسيط
عاوزين وسيلة أتصال
والله ممكن مش محال
ساعات بسيطه
تسمع لهم أو تجاوب عن سؤال
ردَّك يرطب قلبهم
يمسح دموعهم غُلبهم
من بعد ضيق الحال
المسئولين عاوزين مصالح نفسهم
مهما تأكد يوةم عليهم وتقوللهم
بالله ياريِّس
ماعرفنا فيهم كُلُّهم
غير اسمهم
ولامره شُفنا فعلهم
ولامره حس يوم تراب صوت نعلهم
ولاحتى نقدر يوم ياريّس نوصللهم
ولاحتى عارفين شكلهم
أسمع لنا بالله عليك لو فيه مجال
وكل عام وانتم بخير
وبخير حال
ويحفظ بأيدك مصرنا
ميت الف عام
رئيسنا الحبيب
من بعد التحيه والسلام
والمحبه والأحترام
أعذرنى لو خانِّى الكلام
بس أنا مفجور يا ريِّس
وياريت رسالتى توصلك
وتحظى منك بأهتمام
++++++++++
مستر/عطيه الخُضرى
قلين –كفر الشيخ
الأربعاء 14 يوليو 2021 - 17:02 من طرف admin
موضوع: رسالة الى السيد الرئيس 
