لسه فاكر؟ كنت فين ؟

لسه فاكر ؟، كنت فين ؟

كنت فين واحنا بتحصدنا المجازر
يوم ما كان الموت علينا كاس وداير
كنت فين يوم الوجيعه
يوم ما داهمتنا الفجيعه بالزياره للكنيست
يوم ما فاجئتنا الوديعه ف كامبديفيد
وانكشف كل اللى كان خلف الستاير
يوم ما حلينا الضفاير
**
النهارده جاى تقول الكبت سافر
والنباح ملك الجميع ،عارض وجاهر
بعد ما الإقطاعي تمسح
بعض حكم المال ما ( لكَّحْ )
بعد أرواحنا بلغت للحناجر
بع ما الناس اشترت
لقمتها بالدين والضمائر
بعد ما طلعت براعم
جاهله حطين والجزائر
**
النهارده جاى تقول الكبت سافر
بعد أغلى الطير ما هاجر
بعد ما صنَّعْت جيل فارغ وعاقر
بعد ما انمسحت دماغ
الأمه من أغلى المفاخر
بعد ما ربيت عجول من غير عقول
بعد ما ربيت نفوس تحت الكابوس
لملمت طيرها ونامت فى المقابر
**
النهارده جاى تقول الكبت سافر
بعد ما نسينا المحاسبه والدفاتر
بعد ما اتعودنا طابور الرغيف والفقر كافر
بعد ما اتعودنا ندفع أولا ، بعدين نعافر
بعد ما اتعودنا نرضى بالهبات
بعد صوتنا الحر ما اتضعضع ومات
بعد ما اتعودنا نسلم بالسُّكَاتْ
النهارده جاى تقوللى انهض وهابر
وانت لسه ع الماجور راقد وفاجر
ما انته قادر
لسه فاكر
**
سيبنا حبه نختبر
فى نفوسنا لو باقى لنا نخوه
نختبر فى نفوسنا لو
لسه لنا للحريه شهوه
نختبر فى نفوسنا لو
باقى لنا قوه
نختبر لو فيه أمل
فى شاب من ثلاثين سنه
عبقرى وفارس نجيب عن يدَّى انا
انهزم سف التراب
وشرب مجارى منتنه
ونسى المعامل والكتاب فى المطحنه
**
نختبر لو فيه أمل
ينزاح طابور المفسدين
تنزاح مراكز القوى
من وش ناسنا المخلصين
ينفك قيد المحسوبيه والروتين
ينحل وسط الشفاطين
المصاصين الأفاقين
تندك قلعة بياعين
كل الوطن لجيوب رابين
**
سيبنا حبه نحتبر
فى نفوسنا لو لسه أمل
نرجع بشر
نختبر لو فيه أمل
نبعث قيم داسها الغجر
نحيى الضمائر فى النفوس
ونصحى شىء م اللى اندثر
نحيى انتماءنا للتراب
للميَّه للطين للشجر
لتراثنا للبيت الكبير
لتاريخنا فى بطن الحجر
نطرد ثقافة الهباشين
والعشق لرعاة البقر
**
نختبر لو فيه بقابا
فى الشباب المرصوصين
فى " النت كافيه " وعلى الرصيف
متسكعين مستنظرين
يوم الفرج من غير يقين
اللى دفعنا دمنا
فى معركة بيع الرخص
من أجلهم
اللى بلعنا مرغمين
كل المآسي والغصص
فى حبهم
واللى عشانهم عيشنا بنطاطى الجبين
**
نختبر لو فيه أمل
نجمع حطام بيتنا القديم
ونزحزح الزيف والخبث
ونرمم الجرح الأليم
نحيى حاجه م اللى فينا
نختبر نجمع إدينا
أو ندوَّرْ ع اللى لينا
من قرايب غرقانين
نختبر لو فيه أمل
يرجع يغنى للوطن " عبد الحليم "
**
نختبر لو فيه أمل ننسى جراحنا
نختبر ننسى فى يوم إنا اندبحنا
نختبر ننسى اننا كنا اتفضحنا
واننا ممكن نسامح فى جراحنا
واننا نبدأ سوا حاضر كريم
**
سيبنا حبه نعيش فى ذاتنا
سيبنا نسترجع ما فاتنا
سيبنا نجمع ذكرياتنا
سيبنا نتأمِّلْ حياتنا
سيبنا نعرف احنا مين
واحنا فين من أورشليم .
**
د. محمد عبد المطلب جاد
أستاذ سيكولوجيا الإبداع – جامعة طنطا

انا كنت فى الجيش باقضى الخدمة الوطنية
وسعيد بالسلام

النهارده جاى تقول الكبت سافر
بعد أغلى الطير ما هاجر
بعد ما صنَّعْت جيل فارغ وعاقر
بعد ما انمسحت دماغ
الأمه من أغلى المفاخر
بعد ما ربيت عجول من غير عقول
بعد ما ربيت نفوس تحت الكابوس
لملمت طيرها ونامت فى المقابر
************************صح جدا***لكن****
***الامل ***الامل**الامل***
****الامل راجع مع صرخه وليد جديد فى يوم العيد
****راجع بعد ما تعلم و عرف الاصلى من التقليد
***سلمت يداك وشكرا
****مع تحياتى/

مدام الهام كتب:: النهارده جاى تقول الكبت سافر
بعد أغلى الطير ما هاجر
بعد ما صنَّعْت جيل فارغ وعاقر
بعد ما انمسحت دماغ
الأمه من أغلى المفاخر
بعد ما ربيت عجول من غير عقول
بعد ما ربيت نفوس تحت الكابوس
لملمت طيرها ونامت فى المقابر
************************صح جدا***لكن****
***الامل ***الامل**الامل***
****الامل راجع مع صرخه وليد جديد فى يوم العيد
****راجع بعد ما تعلم و عرف الاصلى من التقليد
***سلمت يداك وشكرا
****مع تحياتى/

ياااااااااااااااااااااااااااااااااااااااااا رب

يغير ولا يتغير