نبتدى منين الـحكاية
اهلا وسهلا بك ضيفا عزيزا على المنتدى ويشرفنا ان تقوم بالتسجيل لتساهم معنا فى بناء صرح ثقافى ينتفع به الجميع
عبد الفتاح غنيم


 
الرئيسيةس .و .جالتسجيلدخول
المواضيع الأخيرة
» يا ايها العام اللى عَدَّه
الثلاثاء 2 يناير 2018 - 5:48 من طرف مستر/عطيه الخضرى

» خذينى إليكِ(7)
الإثنين 11 ديسمبر 2017 - 6:16 من طرف admin

» اخون زوجي مع حبيبي السابق... وأكاد انهار !!!
الجمعة 10 نوفمبر 2017 - 2:03 من طرف admin

» برج الحمـــــــــــــــــــــــــــــــــــل
الثلاثاء 28 فبراير 2017 - 0:22 من طرف admin

» لاني فقط اشتقت لكم!
الأحد 5 فبراير 2017 - 9:23 من طرف الفيلسوف الدمياطي2017

» 2016 شفنا فيكى الذُل
الإثنين 23 يناير 2017 - 6:09 من طرف admin

» رسالة الى السيد الرئيس
الثلاثاء 5 يوليو 2016 - 14:16 من طرف مستر/عطيه الخضرى

» ياليلة العبد
الخميس 9 يونيو 2016 - 10:17 من طرف الحب الضائع

» الليلة يكتمل القمر فى كبد السماء
الخميس 9 يونيو 2016 - 10:15 من طرف الحب الضائع

المواضيع الأكثر نشاطاً
برنامج (نبتدى منين الحكاية )
أجمل ما قيل فى حب رسول الله
رجل فى غرفة نومى (حلقة الاربعاء26/10/2011)
يوميات اتنين متزوجين
ام زوجى اغتصبت عذريتى حلقة الاربعاء 26/5/2010
احترمه ولا احبه!!! واخونه!!!حلقة 7/76/2010
هل أكون له زوجة ثانيةلانه تستر على ويقول انه يحبنى ؟
قلبى يحترق لان امى تقتل حبى(حلقة الاربعاء 22/8/2012)
زوجى صفر على عشرة فى اختبار الثقة (كيد النسا 1)الاربعاء 7/3/2012
حملت سفاحا واخاف ان يكون الابن شبيها لابيه الحقيقى (الحلقة القادمة )

شاطر | 
 

 30 سنه بيفرقوا بين دين محمد وعيسى

اذهب الى الأسفل 
كاتب الموضوعرسالة
مستر/عطيه الخضرى
مشرف منتدى الشعر
مشرف منتدى الشعر
avatar

ذكر
عدد المساهمات : 949
نقاط : 1860
تاريخ التسجيل : 09/02/2011
العمر : 53
الموقع : http://attia-elkhodary.forumegypt.ne

مُساهمةموضوع: 30 سنه بيفرقوا بين دين محمد وعيسى   الثلاثاء 19 يونيو 2012 - 10:45

بعد ما طالت حبستك
وطالت معاها كبوتك
مبروك يا مصر فرحتك
جالك رئيس
طالع نتاج من ثورتك
30 سنه كانت كبيسه
30 سنه بيفرقوا
بين دين محمد وعيسى
30 سنه والاضطهاد
لاخوان المساجد والكنيسه
وأهو جالنا ريس
عشان يعمر
ويزود الانتاج
ويُعبر التفليسه
80 سنه يتحملوا
علشان بلدهم
ومعادن الاخوان نفيسه
اتحطوا وف قلب السجون
من بين ولادهم
كانوا ياخدوهم
وكات تهون
والمساعى بالخطاوى
كات حسيسه
أنا جاى اشارك
وكمان أبارك
وأقول يا مصر
معدش نارك
ولا عاد مرارك
ومن تانى
راح يطلع نهارك
وريس الاخوان
هيعدل مسارك
هياخد برأيك
وينفذ قرارك
ويرسم
على ارض الحياه افكارك
وأنا جاى
قابلت اكتر من فلان
وكل واحد حملنى رساله
هقولها بسرعه
وف عُجاله
ريسنا مرسى

الحاجه فاطمه
جات تقوللك
بص يابنى
لا تقول لواحد
قوم وصلِّى
لاتقول لواحد ربِّى لِحيه
او حتى واحده
تقوللها تلبس نقاب
الشغله دى مش شغلتك
دا فرضنا ف السنه
من بعد الكتاب
تقدر تغير فى الشخوص
وفى المناهج
تقدر تريح الاباء
فى كل بيت
علشان يربوا ع الفضيله
تقدر تحسن فى الائمه
تقدر تحسن فى الوسيله
وتختار الافاضل
تقدر تفاضل
ومتدخرش اى حيله
الوسايل الغير مباشره
مش قليله
مش هتدَّخل فى دين
وف كل وقت
تكون معين
راح تبقى زين
وبدل متقعد المُدَّه
هتكون مُدتين


وأم سيد
جايه تجرى
يا عم شاعر قول لهم
اشرح لهم
فضفض لهم
قد ايه بنحبهم
همنا كان همهم
ومصرنا دى مصرهم
وعمرنا من عمرهم
على عهدهم
نفسنا نشوف وعدهم
يشمروا
ويعمروا
يتواضعوا مش يتأمروا
ولا وطنى تانى يكرروا
ادينا للاخوان بصدق
علشان بيتقوا ربنا
قبل العمل بيفكروا
ولا يوم علينا اتاخروا
ولا مننا كانوا يسخروا
دلوقتى لازم يفخروا
لانهم جوه القلوب
للمحبه فجَّروا
80 سنه يتمرروا
جا وقتهم يتحرروا
يتطوروا
ويتغيروا
ريسنا مرسى
ابنى سيد واخوه محمد
وابوه على
من غير عمل
30 سنه فاقدين امل
30 سنه
والوضع زفت مش محتمل
م اللف ع الوظايف جوزى مل
كل الوظايف قدموا فيها
ولا اى حل
ولا حد قال لنا
مالكم فى يوم
ولا جه وطل
والعيشه مره
ولا عاد بصل
ولا حتى خل
وابو العيال انعل
الراجل تعب وانسل
قرَّب خلاص ينشل
علشان نعيش
بعت الجاموسه والعجل
وضربتهم بالرجل
هنموتوا يعنى
واما الفلوس خلصت
انا قلت ابيع الفجل
بالله عليك ياريس
عايزين عمل للراجل
وشغلانه للعيال
الامر اصبح عاجل
والوضع بسرعه مال
ولاعدش مال
ولا عاد جَمال
من كُتر الالم
والفقر والاحمال
معدش باقى احتمال
ولا عدش اخ
ولا عدش عم
ولا عاد لاقريب ولا خال
بالله عليك
تقدر تجاوب ع السؤال
هل فيه امل
ولا الامل اصبح مُحال
والحاج عبده
جاى يقوللى
وانا واقف
وبتوضى على الميضا
هل ياترى يا ابنى
بعد السواد والضلام
تبقى الحياه بيضه
وتقدر تجيب بالجنيه
العيش مع البيضا
هل يا ترى يا ابنى
هقدر اجيب لى لباس
واجيب لى جلابيه
ما اللى لابسها
صبحت خلاص عَتِّه
هل ياترى يا ابنى
راح ترجع اللحمه
واكلها ع الفته
قلبى انحرق
م اللفت
والملح والقتَّه
هل يا ابنى هقدر
فى يوم اكسى العيال وامهم
اصل العيال سِته
واشوف لهم حِتِّه
والبت اكلفته
واقدر استته
====================
وابن عم مصطفى من سيدى سالم
من عزبة الورق
بالله عليك يا مستر
قوللهم قلبى انحرق
الفصل مليان بالعيال
وكل واحد
نازل يصر م العرق
ولا عاد مدرس
يحضر حصص
وان يوم حضر
لايشرح بجد
ولا يجاوب سؤال
وكل حبه انفعال
ولما اشيل لى
ساندوتش بينسرق
نفسنا
تبقى المناهج متحسنه
والولاد جوه الفصول متأمنه
والابهات والامهات
تكون ع العيال مطَّمنه
عايزين أدارات بجد
لونها يبقى الالتزام
مش على كل لون متلّوِنه
عايزين مُدرس
يتق فينا ربنا
ويحبنا
يشرح لنا
لو يوم غلطنا يقول لنا
هل يا ترى الحلم ده
هيكون لنا
والست ساميه
بنت السعيد
ابن احمد البربوش
قالت امانه تقول لهم
بالله عليكوا ما تنسوش
فوق العشر سنوات
شغَّاله فى التشجير
40 جنيه
وفوق كده
7 سنين مبيقبضوش
جه القرار بالتعيينات ومعينوش
ومجلس الشعب الكريم
قال القرار هنَّفذه
وشعبنا راح ننقذه
ونعين اللى متعينوش
لا حد عبر القرار
وكلهم مينفذوش
بالله عليكم انجدنا
حلمنا قرَّب يبوش
بس قولوا لاصحاب القرار
اتقوا ربنا
انتوا ايه
من ربنا ما بتخافوش
30 سنه مبتسألوش
يارب حُوش
وأرحمنا من جرى الوحُوش
وحسبنا الله ونعم الوكيل
فى اللى مبيرحموش
----------------
وسين وصاد
ولام وعين
وحاجات كتير بالشكل ده
والناس صحيح متأكده
ان ريسنا الجديد
ماهوش ظالم
ولا عُمره
هيكون كِده
ان ريسنا الجديد
هيحرك السفينه
فى المياه الراكده
وهيفرخ القلوب بالسعاده
30 سنه متنكده
يارب احفظ لنا الرئيس
لجل ما نكيد العدا
وافتح على ايده
كل البيبان
اللى كانت 30 سنه متسدده
واجعل قيادته راشده
============
عطيه الخضرى عطيه
قلين البلد-مركز قلين
محافظه كفر الشيخ




_________________
عطيه خضرى عطيه
قلين / كفر الشيخ

الرجوع الى أعلى الصفحة اذهب الى الأسفل
عطيه الخضرى

avatar

ذكر
عدد المساهمات : 16
نقاط : 29
تاريخ التسجيل : 11/09/2012
العمر : 53

مُساهمةموضوع: رد: 30 سنه بيفرقوا بين دين محمد وعيسى   الخميس 4 أكتوبر 2012 - 17:51

يارب احفظ لنا الرئيس
لجل ما نكيد العدا
وافتح على ايده
كل البيبان
اللى كانت 30 سنه متسدده
واجعل قيادته راشده

_________________




عطيه الخضرى
قلين/كفر الشيخ
الرجوع الى أعلى الصفحة اذهب الى الأسفل
 
30 سنه بيفرقوا بين دين محمد وعيسى
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
نبتدى منين الـحكاية :: منتدى الشاعر عطيه الخضرى عطيه-
انتقل الى: